淘寶糖果盒

前幾日我又在淘寶搵到間賣幾靚既糖果盒鋪頭啦!! 終是我就訂左幾個糖果盒做sample 啦! 昨天收到貨啦! 品質好過我上次訂果間好好多....而且又唔係太貴...我就幾鍾意粉紅色果個袋形既盒 同正方形深藍色蝴蝶結有暗花紋果個糖果盒......今個星期六比埋我未來老公看完...如果佢都覺得ok..甘我就可以大量訂貨啦^^

喜字掛飾 (3m 長) :  $ 4.6 / 條
卡通利是封: $ 0.5 / 個
紅色果個袋形糖果盒 : $ 0.85 / 個
深藍色蝴蝶結有暗花紋糖果盒 : $ 1.18 / 個
啡色 / 淺藍色 蝴蝶結 糖果盒 : $ 1.06 / 個

 

 

 

DIY 喜帖信封

話說上次去揀帖果時...我地就揀張張西式喜帖....不過果間鋪跟比我地個信封就勁中式! 我同我未來老公都好唔鍾意甘既組合....於事乎我地就決定自己DIY 整個信封啦! 前排我行過間文具鋪見到款信封幾靚就買左返黎打算之後做DIY 信封用啦^^  遲下買埋D岩心水既印仔就可以動手做信封啦!!

紅色 /   粉紅色信封 : $  14 / 包

深水埗買手工材料

早幾日自己一個人去左深水埗買手工既材料.....自已行左兩個鐘就已經買左一袋二袋又平又抵既材料啦!! 足夠我慢慢做一排手工啦^^

黑絨布: $ 15 / 碼

藍色暗花布: $ 20 / 碼

蕾士 : $ 14 / 碼 

 

喜字耳環牌: $ 12 / 對

耳環扣 : $ 10 / 包

 

珍珠色珠仔: $ 1 / g 

 

  

淘寶 回禮禮物

前幾日我在淘寶見到有d好得意既回禮禮物同埋糖果盒....終是就出於好奇下訂左幾個返黎.....不過我就覺得果幾個糖果盒好無網上見到果d甘靚既......不過我訂回來仲幾個杯 就真係幾靚.....可惜價錢太貴啦!!唔可以用黎做回禮禮物~.~

新娘新郎造型紙糖果盒  : $ 1.8 / 一對
新娘新郎造型鐵糖果盒  : $ 3.2 / 個
米色糖果盒  : 1.1 / 個
粉紅色糖果盒 : 1.35 / 個

 

玻璃櫻花杯墊 一片 : $ 8.8 / 片

玻璃櫻花杯墊 兩片 : $ 8.8 / 一對

新娘新郎造型玻璃杯墊 兩片 : $ 8.8 / 對

水晶南瓜車 : $ 19.8 / 個

 

餅卡入手

早前同左未來老公去左婚紗展大量入手左d西餅卡同唐餅卡.......留番遲下用!!!  嘻嘻..我D FD 都話我仲咩甘早買餅卡...不過我就見而家個價平就買定先啦! 費事到時貴又要局住你買啦! RIGHT?

聖安娜西餅卡: $ 35 / per
奇華餅卡  : $ 56 / per

DIY布玫瑰花

呵呵~~ 昨天終於都整好左一朵布玫瑰花啦^^ 不過呢款 布玫瑰花 要整既工序真係好繁複....如果要大量去整既話都幾"shine"時間....所以我決定今晚試下整第二款既花先得^^

深水埗買布材料

前幾日過左深水埗買左D布...諗住自己DIY整D布花花用來做手花 or 場地布置.....原來在深水埗果頭買布好平嫁....1碼布大概$15-20...就可以比你整好多野啦!! 如果大家有興趣想整DIY野都可以去深水埗行下....可以買到多好材料...發揮你既小宇宙嫁^^

遲下我整好我既手作再Upload 上來比你們看啦^^ 

材料:
絨布  $ 15/ 碼
黑色布 $ 10/ 碼
黑線   $ 3 /卷
黑線   $ 2 /卷 

決定選擇<現代經典> 的一條龍套餐

經過個幾月的尋尋覓覓....我同我男朋友兼未來老公最後都係決定左我地既當日攝影、化妝同禮服、婚紗都係搵<現代經典>.....  因為我地之前係搵佢地影pre-wedding...始終都知道佢地既質素....同埋我就幾鍾意佢地既Ida 同我化果個妝...而且我地又見佢地影d相同埋佢地整既成長片段又幾有新意...同出面果d唔同既...於是係甘多好的條件底下.....最後我地就決定搵<現代經典>一條龍做晒佢啦^^

而且 <現代經典> 因為我地之前搵佢地影pre-wedding.....所以佢地都比左個優惠既price 比我地...我地計過都同出面平左小小...其實我地覺得就算貴一兩千都會找佢地的...因為佢地既質素有信心既保證ma!

我地個package 包括以下果d:

當日化妝 $ 8,800 
全日新娘化妝 + 造型 及 手飾 (10 小時)
1位伴娘化妝 及 髮型
1位媽咪化妝 及 髮型  
P.S:  另外我加左$ 500 試妝 

外租禮服 $ 5,980  (原本: $ 5,980 )
可以租7套禮服、婚紗、晚裝 (原本只可租4件)

當日攝影及錄影 $ 12,500 (原本: $ 14,800)
2 P + 1V
全日攝影 (15小時)
成長片段
全數碼攝影檔
20 張相 8x12 相簿
後期剪攝及配樂DVD 3套

全Package total $ 27,780

Free Lance 化妝師試妝

前排我同事同我說...佢有個朋友charis係做新娘化妝的....知道我仲未搵到化妝師....終是就叫我去試妝....試妝當日charis同我試左3個髮型...請真我真係覺得charis個整既髮型真係幾靚嫁! 

不過我本人就覺得佢同我化個妝就無上次pre-wedding 化果個妝甘靚...同埋個妝好似太濃...(不過 charis 同我講話當日化妝一定要濃d先好看!!!)可能我個人唔太鍾意甘濃既妝啦!!! 所以我最後都無搵佢化妝!!! 不過點都要多謝charis 用左甘多時間同心機同我化妝...thank you so much^^

揀婚紗相

影左婚紗相甘耐...終於都可以去看下d相影成點啦! 影出黎d杷既放果都唔錯啊! 影到我同我男朋友都好靚^^  我地個package 一共就包我地揀80張相既.....不過d相實在影得我地太靚啦! 我地足足用左2個幾鐘先可以在300張相入面揀左80張相....呵呵!!我地只係加左1500揀左兩張效果相咋!!  總算無over budget啦!!  過多掛影樓話幫我地執好相之後...會再約我地去看電子排版的!  好期待啊...唔會到時實物會點呢?

澳門影pre-wedding 相啦!! (香港現代經典)

話甘快終於到我影pre-wedding 既日子啦! 總括來說我都真係好滿意<現代經典>同我影pre-wedding 相既服務同佢地既專業，令我同我男朋友果日影相影得好開心!  值得一讚既係化妝師ida 佢幫我化個妝同埋set 果d髮型等....我都好鐘意^^(真係估唔到佢可以令我甘靚^^)，個個朋友睇完我d相都話我個妝化得我好自然同好靚!!! 真係好開心...另外佢仲好細心同我打點住我影相時我所需...(比如細心同我地拿手袋...花球等....拿水比我喝.....可能對佢來說是工作的一部份....不過果一刻佢真係好幫得我手.....所以令我特別記得).令我可以最安心時心情去影相....而係呢度仲比我選到一件好適合我而且仲著得我好靚既婚紗同晚裝添^^

另外，亦要多謝攝影師vincent 的專業，拍攝其間和緩我地影相時緊張既心情....令我地影相時表現到最自然既一刻...同最靚的角度拍攝...將我地影得好靚添^^ (雖然佢叫我地擺既post 動作比較高難度!!! 不過影到甘靚既相....辛苦都值得!!!!) thanks a lot!

以下係影pre-wedding 的小小花絮相片!! 花絮我已經覺得好靚啦! 攝影師話兩個星期後就可以去總店看相啦!! 真係好期待啊!!!

DIY 花球

話甘快又過左幾個月啦! 時間真係好快過! 呢幾個月我就開始為Pre-wedding準備，一直我都想在Pre-wedding果時我可以拿個自己喜歡的花球相....不過如果真係出去買個花球又好貴播.....
自己又唔係好捨得.....於是自己就上網睇下有無人教整花球啦!

 最後係網上見到好多教人整DIY 野既資料…而比我趕得切在Pre-wedding前整好左2個花球^^  一個係絲花球, 一個係我手做的心心絨花球^^

 絲花球材料:

1.  花球手柄  (旺角繽紛買 $10)

2.  絲花數扎  (花園街賣絲花的伯伯   $120內)

3.  熱溶槍 (實惠  $60)

4.  剪鉗   (實惠  $20)

5.  絲帶   (旺角繽紛買 $10)

制成品: 

 心心絨花球

1.   絨布  20塊  (花園街賣針線檔口  $10 * 3塊)

2.   0.2mm綠色鐵線  2 pack   (文具店 $12 * 1 pack)

3.   綠色扎花膠紙    (旺角繽紛買 $10)

4.   心型焗曲奇膠模   (實惠  $60)

5.  絲帶   (旺角繽紛買 $10)

制成品: 
 

  














大功告成!! 希望到時影Pre-wedding時個效果OK 啦!! 

決定去<囍.嫁>印帖同安排了證婚律師啦!

今個星期我地終於用左煌府送比我地果張印帖優惠劵，去<囍.嫁>印帖啦~ 講真原來用優惠劵上到去個D人服務質素都無甘好GA! 我地上到去就選中左張帖，不過帖入面跟果張紙我地就唔太LIKE….我地問個負責人入面果張紙可不可以轉第二個款，答我地野果個人就係甘同我地講個張紙係嘍帖的無得轉，我男朋友問左佢兩次我地加錢有無得轉，佢地先醒水比左第二D紙我地選LAW…有珍珠紙同牛油紙比我地選，不過兩個都要加250蚊版費同1蚊一張紙，最後我地就選左珍珠紙。不過又有另一個問題就係，佢地跟比我地個信封就勁唔MATCH LAW! 我地係西式帖，不過佢地就比個勁中式既信封我地，之後又話帖入面果張金色線要加2亳子一條LAW! 樣樣都拆開晒收我地錢，最後我地梗係無加啦~我地打算印好晒D帖之後我地再後期加工，決定唔比佢賺甘多!

 由於襟花，其實<囍.嫁>都會送10個比我地既，不過我地就覺得果度D款就真係麻麻啦!所以我地就暫時未選襟花，等我地再睇下有無更好既款先啦! 

 另外，今日我去左比埋第一筆訂既尾數比吳剛師傅，吳剛師傅同我地講幫我地搵左個$2800既中環律師同我地當日證婚，我地見個價又唔太貴，甘我地今日又順便CONFRIM埋個律師啦! 師傅話遲下律師會搵日約我地出來見面，問我地攞埋D資料同我地搞證婚文件GA LA! 呼~又搞店多樣野啦~哈^^ 

已決定Pre-Wedding 相 (現代經典-香港店)

今日我同男朋友就打算去睇下吳剛師傅比我果D優惠券既公司係送D咩比我地。我地首先就去左免費印帖果間公司<囍.嫁>，嘩…上到間公司果度真係超多人呀!好多人都好似我地甘上去選囍帖，<囍.嫁>甘面其實都有好多帖既款式比我地煌府既新人CHOOSE….只有8款厚身既帖要加錢，其實款都不用我地加錢，不過我地就覺得D帖好似普通左小小甘，因為果度D帖既款都比較大路D既，至於襟花優惠既都係<囍.嫁>呢間公司既，不過我地就覺得果度D 襟花D款就比較小LOR… SO 我地就打算再睇下其他地方D帖同襟花再決定用唔用呢度D優惠。

之後我就去左金都睇當日攝影及租花車服務優惠既<NO. 1> ，呢間公司除左有當日攝影及租花車服務，仲有新娘化妝GA…我地無佢地公司同優惠券請一個攝影師同一個攝錄師就要$4XXX，如果請一個攝影師同一個攝錄師同一個SNAPSHOT就要$7XXX ，如果請一個攝影師同一個攝錄師同一個SNAPSHOT當日請多個派即影即有相既就要$9XXX ，而我地煌府新人JOIN 佢PACKAGE 仲可以送多3份佢地既禮物!
化車服務就1架租VAN仔6個鐘+1架私家車租3個鐘個PACKAGE 就$29XX ，而新娘化妝就$6XXX全日，全日任換造型，包1個件娘，2個媽咪化妝一次，如果姊妹要化妝就一個人加$250 化妝一次。
不過我男朋友就覺得呢間公司既當日攝影同VIDIO 就麻麻地，佢覺得<NO. 1>拍出來的感覺好普通，無咩特別LOR。不過我就覺得花車個價錢就OK啦…而化妝就要再睇下啦!

睇完<NO. 1>我地就去左金都其他鋪頭睇野，發覺原來金都真係有好多唔用既結婚野買GA…咩都有，我地去左印帖果D鋪頭，都睇中左幾款帖，果幾款都係好似有個囍字係上面，不過就係通花既，不過原來一張帖都唔平GA…就甘翻開既印200張就要成$15印，如果係拉出來既印200張就要$10.5啦~好貴啊…甘樣印一印都要成 $3000啦~(唔通真係要搵<囍.嫁>印帖?)   我地果去左D整花球公司度睇，之前成日都覺得花球要用真花先靚…不過我見完D絲花球之後，先知道而家D絲花球都整得好靚WO…分分鐘可以以假亂真啊~所以我諗我第時都會用絲花球^^起碼無甘快謝MA~

我地行完金都就打算去尖沙咀<希臘女神>睇下佢地送婚紗攝影係D咩，我地行到去尖沙咀金巴利道，比我地見地我地之前有興趣想去澳門影婚紗相果間< 現代經典 HK分店>，終是我地就走左入去問D INFOMATION 啦!其實HK分店分店都有幾個過澳門影相既PACKAGE 有 $10980，$16980同 $24980，佢地最大既分別係最平果個就包30張相，之後每張$168 ，$16980果個我地影左150張相之後就所有檔比番我地，就有50張相執好相放入相簿的，而$24980果個就係HK 同澳門影2日相果個我地影左300張相之後就所有檔比番我地。

其實我地就對$16980個PACKAGE 好有興趣，而且想知佢地同澳門間公司有咩分別，佢地話到時最大分別就係佢地D攝影師係由HK過去澳門影相既，而選相同拿相都係在HK，不用在澳門拿回來甘辛苦，我地可以在選婚紗甘就不用由HK 拿衫過去甘麻煩，而我男朋友又覺得佢地影D相又幾好，其實都心動想係度影，不過個價又真係貴左小小所以就決定唔到。後尾個SALES 見我地都好有心想係度影佢地就主動比左好多OFFER 我地。我地見平左甘多又UPDATE 左甘多野，所以就決定左地既PRE-WEEDING 相係< 現代經典 HK分店>啦!共比左 $ 17780…比我地之前個BUDGET 多左$6000 呀~ 我地之後一定要好好甘控制下BUDGET 啦~

特別OFFER FOR US:
1. PACKAGE $15980 (原本 $ 16980)
2. 14”X 14” 相簿 (原本是10” X 15”)
3. 80張相包執入相簿 (原本50張相包執入相簿)
4. 22” X 30” 油畫 (原本20” X 24”)
5. 3套衫包造型 (原本2套)
6. 送2張放果相 (原本1張要收160蚊)
(4個景點: 勵進大道、主教山、威尼斯人夜景、萊斯酒店
~ 之後我地仲加左$1800 住萊斯酒店，因為我地因在萊斯酒店影相

去完< 現代經典> 我地繼續去<希臘女神>問果個優惠啦~ 原來煌府送比我地個婚紗攝影個PACKAGE ($45XX) 係包男女各1套衫、化妝同送1張大油畫布不包框同14張散的相沒有相簿的…..仲要只係在影樓影室內同花園景JA….我聽完之後O晒嘴….如果要有框同相簿就要加$26XX 去UPGARDE 個PACKAGE 甘就會有相同框啦~我聽完之後就覺得好搵笨啦~原來係唔係都要比錢去影相~ 我地當然無比錢…話要考慮下啦…不過SALES 話張優惠券得1月會限期…要我地盡快決定唔好浪費個優惠LOR…..其實我覺得我地都JOIN 左< 現代經典>啦….我估我地都唔會再洗D無謂錢影相LOR!

  

已決定婚宴場地~國際都會<煌府鑽石廳>

今個星期我同男朋友打算係決定落訂國際都會<煌府鑽石廳>前，去多個場地睇下，上次同我朋友傾計佢話係MEGA BOX果間<喜百合>個場都OK….於是我地今日就去左睇<喜百合>個場啦!其實<喜百合>個場都唔差，個場就係長方形既，門口有個雀籠位置，係開席前擺餐前小食用既。而且則邊仲有落地玻璃去可以睇到出面個境都幾開揚GA!不過如果15圍包場就要11萬LOR!而個菜單得一個係全包宴(即免加一同包酒水) 其實D菜單就要加一同要加300蚊酒水….不過呢D都唔係我唔選呢個場個原因，最主要既原因係個交通真係好唔方便LOR! 第一，去MEGA BOX要坐接駁巴士OR TAXI 先到已經唔方便啦~第二,由地下上去<喜百合>14樓都要轉2次LIFT 先到,真係好唔方便，所以我最後都係決定去返國際都會<煌府鑽石廳>擺啦!

下午我聽聞鑽石山廣場有小型婚紗攝影展，我就同男朋友八八卦卦去睇下啦!其實我地一直都想我地個PRE WEDDING 係澳門影GA…於是我地重點就問左幾間公司有關澳門婚紗攝影D PACKAGE…不過原來都唔平GA…最小都要成$10000，HK 影就平D 7XXX 就有啦!

我地睇左有間公司<MY DREAM WEDDING> 佢地影相D風格我地都幾鍾意，而旦影出來D相既放果亦都好靚，D衫又唔錯，個PACKAGE 要$14999 在澳門景3個景, 10個鐘, 男女2件衫，包化妝同SET 頭，2本相簿，一個相架同而幅油畫，不過就得50張相LOR! 我同男友都覺得好似貴左D甘，所以我地都未決定到影唔影佢!不過唔急啦~仲有大把時間….慢慢搵啦!

晚上我地帶左媽咪一齊去國際都會<煌府鑽石廳>睇場，媽咪睇完之後都幾LIKE個場，仲話個交通好方便TIM^^ 之後我地就去搵吳剛師傅比埋個尾數同埋順便睇下可唔可以搵多小小優惠啦! 其實我同男友係想選$6198 張菜單既，不過如果我地加埋D酒水同2013年加果200蚊同加一既話甘就有小小OVER BUDGET….甘我地就想問師傅可唔可以免我地酒水啦~ 師傅說酒水就真係唔可以免比我地…不過我地就可以用最平果個菜單加100蚊(原本要300蚊先可以UOGARDE GA) UPGARDE $6198張菜單既原只鮑魚….甘即係變相平左酒水比我地! 而且師傅話如果我地想係佢地個場證婚，仲可以同我地搵律師TIM! 佢地有個搵開既律師，律師+結婚證書都係$2800 (比出面平左$500 啦)。

我見師傅甘有承意…甘我地就決定比埋13000蚊訂比師傅啦~不過我地雖然想比晒D訂比師傅…不過師傅ONLY 收我地$ 8000 ….叫我地22號再比埋果$5000 WO! 之後師傅仲話，如果我地有興趣去佢地酒樓試酒席菜單，佢仲可以比我地7折去試菜TIM^^ 不過點都好啦~而家我地總算搞店左場地果PART 啦~算係踏出左成功既一小步! 

另外，我地今日落完訂之後，師傅就一次過送左好多優惠券比我地啦~好似免費印帖、免費襟花一套、8折過大禮優惠、新娘化妝優惠、希臘女神婚紗攝影(價值$4XXX)、$1000希臘女神婚紗租借優惠、當日攝影及租花車服務優惠，等明天得閒過去看下先!